E seleccion a caba e ciclo di eliminatorio pa Mundial Brasil 2027 c’un “Broche de Oro”, nan a pon’e e pluimpje rib’e bolo na Stadion Rignaal ‘Jean’ Francisca, ganando di e seleccion di Korsou n’un forma mas cu convincente; nan a sigura e di tres lugar den e grupo, demostrando cu nan por competi n’un nivel mas halto awor, y di awor en adelante nan ‘no’ lo wordo considera ekipo chikito mas.
–
–
Aruba a cuminsa e eliminatorio e mas abou den ranking den e grupo aki. Di biaha den nan prome wega nan a despacha Saint Kitts & Nevis cu ta rank 141 (25 puesto mas halto cu nos), 2-1 na Stadion Trinidad. Despues Cuba (rank 94) a yega Aruba y pa chiripa a gana nos 1-0 c’un gol milagroso di distancia, un partido cu Aruba tabata igual of hasta levemente mihor.
E siguiente partido na Panama tabata un clash cu e “top-dog” mes den e grupo, y un faborito pa bay mundial (rank 56); Aruba a bataya pero a perde, e score di 1-3 no ta refleha realidad. E pinalti fantasma na 73′ a opaca e logro, atras 1-2 bayendo den e ultimo minuut nan lo tabata mas husto, p’aso Aruba a hunga mihor den e di dos tempo y a merece mas contra un ekipo cu ta rank 130 puesto mas halto cu nos!
Awenochi na stadion Rignaal ‘Jean’ Francisca nan a hunga contra un seleccion di Korsou (cu tambe tabata rank mas halto cu nos, prome cu e partido, ya no mas) c’un chens pa demostra con bon nan ta, kizas mihor cu nan mes a pensa. Awor ta tempo pa bay pa mas, di awor en adelante nan por “dream bigger”, pakiko no?
Aruba a cuminsa e partido aki na Willemstad cu gran urgencia y intensidad, Korsou no tabata sa ta kiko a dal nan, e ekipo Arubiano tabata den “total focus” y determina, hasta un poco ‘rabia’, p’aso nan sa cu nan no ta ekipo chikito mas, y lo kier a “proof” nan mes. Nan no a laga bai di e bala fei cuminsamento di wega y na minuut 6 ya ta canta gol, e prome di e wega, bunita gol di Tarianna Doornkamp cu asistencia di e hungador hoben Adannayah Breinburg. Aruba 1-0 Korsou.
Siguientemente Aruba ta sigui ta cu e bala, pero tambe toch a wanta un poco, nan a logra retene mayoria di e bala p’un diez minuut mas, sabiendo cu Korsou lo bay sali todo por todo pa empata e wega, nan a bay cu cautela, bon move! dicho hecho, Korsou alfin a tuma beslag di e bala y nan tabatin mas yegada di peliger entre minuut 20 y 40, Aruba a defende hopi bon y a busca salida ora a haya espacio den e atakenan grandi di e rival.
Den nan mihor momentonan di posesion den e prome tempo, Korsou tabatin tres tiro peligroso riba porteria defend’i pa Hadassah Kock, cu a hay’e ta hasi un ‘dobel salbada’, tremendo, pa despues di un minuut haci otro salbada spectacular pa mantene e wega 1-0 pa Aruba.
Den tur esaki, Aruba a cuminsa haya mas yegada di peliger den “counter-attack”, y na un di e yegada nan aki nan ta haya un freekick net na rand di area penal di Korsou na minuut 43, unda capitan di Aruba, Soraya Verhoeve no ta pordona y ta anota un delicioso gol p’e 2-0 pa nos seleccion, y asina halftime ta bay aden.
Den e di dos tempo, Korsou a sali mas agresivo, decidi pa anota un gol pa corta bentaha y drenta den e wega. Nan a logra tambe, ora cu na 52 minuut portero di Aruba, Hadassah Kock, cu eigenlijk tabatin un bon wega, a faya den un intento di rechasa e bala den un atake di Korsou, na rand di area penal, e bala a “drief” den area penal unda e hungador Amazia Burnet ta push’e bala den gol p’e 1-2.
Aruba no a warda pa gana, y ni un minuut despues Aisse Gumbs ta wordo tumba den area penal y referee ta pita pinalti pa Aruba. Tarianna Doornkamp ta anota clinicamente su di dos gol di e wega for di punto penal p’e 3-1 na fabor di Aruba.
Poco poco e condicion fisico di Aruba a cuminsa impon’e den e wega, nan a coy e bala bay cu’e y scondie p’e resto di e partido. Na minuut 67 Aisse Gumbs ta haya un pas’e di Soraya Verhoeve y ta anota otro gol pa Aruba, pa hasi e wega 4-1.
Atakenan Arubiano ta sigui y e siguiente gol ta cay na minuut 80 pa medio di Adannayah Breinburg, cu tabatin un gran partido, y net prome cu el a wordo substitui, e ta haya un pas’e di defensa central Michaela Netto, cu wega trei wega ta consolidando su mes como un gran hungador cu ta defende hopi bon y tin vision tambe p’e wega ofensivo, sigur candidato p’e “player of the match” awenochi (hunto cu Breinburg, Verhoeve, Doornkamp..), Breinburg ta anota e gol p’e 5-1.
Aruba tabatin e luhosidad di haci mas cambio c’e bentaha grandi, dunando mas hungador nan un chens pa subi cancha y experencia e momento aki. Na minuut 90+4, Jennifer Henao ta anota e ultimo gol di e partido, unda Henao ta haya e bala despues di un rebote den area penal y ta deposita e bala den net p’e 6-1. E hobennan a celebra den grandi, merecidamente.
Partido ta termina c’un victoria grandi p’a nos seleccion riba Korsou, kizas un di e victorianan mas grandi di tur tempo riba nos hermana isla. Caranan contento, feliz cu e logro, algun lagrima di euforia di logro, brasanan duro, p’esaki nan ta hunga bala den e deporte rey, nan ekipo ta victorioso, nan a logra mas cu nan meta.
Pabien na henter e ekipo, for di hungadornan te cu e staff di coach y asistent nan, un trabou di ekipo sin duda
Nota: nos ta manda palabranan di condolencia y forsa na Joya Tromp (rechtsback di Aruba) y su famia c’e perdida di nan wela.
–
Recap:
–
⚽6′ Tarianna Doornkamp ARU ⚽43′ Soraya Verhoeve ARU ⚽52′ Amazia Burnet CUR ⚽54′ Tarianna Doornkamp ARU ⚽67′ Aisse Gumbs ARU ⚽80′ Adannayah Breinburg ARU ⚽90’+4′ Jennifer Henao ARU
🟨’4 Strijdhaftig CUR 🟨’42 S.Martina CUR 🟨50′ K. Martina CUR 🟨’69 Burnet CUR🟨’84 Aisse Gumbs ARU
